Azərbaycan Dövlət Pantomimo Teatrı yeni mövsümünü Üzeyir Hacıbəylinin “Dulusçu” tamaşası ilə açıb. SİA-nın məlumatına görə, tamaşa dahi Azərbaycan bəstəkarı Üzeyir Hacıbəylinin 125 illik yubileyinə həsr olunub. Tamaşanın quruluşçu rejissoru əməkdar incəsənət xadimi Bəxtiyar Xanızadədir. Tamaşanın aktyoru və teatrın direktoru Elman Rəfiyev bildirib ki, bu tamaşa ilk dəfə 2002-ci ildə Mədəniyyət və Turizm Nazirliyinin sifarişi ilə hazırlanıb. “Bu dəfə tamaşanı Üzeyir Hacıbəylinin 125 illik yubileyi münasibəti ilə yenidən səhnələşdirdik. Nazirlikdən bizə təklif gəldi ki, bu tamaşa festivala salınsın. Tamaşanın musiqi tərtibatçısı teatrın direktoru, aktyor Elman Rəfiyev, rəssamı Qurban Məsimovdur. Rollarda əməkdar artist Bəhruz Əhmədli, Elman Rəfiyev, Nargilə Qəribova, Sabirə Həsənova, Əflatun Abdullayev, Nurlan Rüstəmov, Əli Əlizadə və başqaları çıxış edib. Məlumat üçün bildirək ki, tamaşa dahi Azərbaycan bəstəkarı Üzeyir Hacıbəylinin “Biz nə tövr iş görürük” adlı felyetonu əsasında hazırlanıb. Felyeton səhnələşdirilərək pantomima teatr dilinə yaxınlaşdırılıb və şərti olaraq “Dulusçu” adı ilə 2002-ci ildə tamaşaçılara təqdim edilib.